මා සතු සිප් සතර නිරතුරු ලැබ ගන්නා
සිසු කැළ බොහෝ ඇත පංතිය තුළ ඉන්නා
ඉදිරියෙ පෙළක ඔබ නෙත් යුග ඇත දන්නා
ඒ නෙතු නිතර මා දෙස බලමින් උන්නා
මොහොතක සිටී හසරැළි කැන් මුවග ඇඳී
සිනහව මැකේ තව මොහොතක කඳුළු රැඳී
අතරින් පතර ඔබ නුවනග බැලුම් දිදී
නිසසල මසිත හෙමිහිට ඔබ වෙතට අදී
ඔබ රුව දැකුම හා ඉඳහිට දොඩන බස
සැබවින් කියතහොත් මා සිත කරයි තොස
එනමුදු නොමැත අවසර ලෝ දහම ලෙස
ගුරු සිසු ඇසුරකට පොතපත වලට මිස
අවිහිංසකයි බොලඳයි ඔබෙ යොවුන් සිත
දිවි මඟ කම්කටොළු තව මුණගැසී නැත
අද දින උගෙන පෙම් හදකට බැඳී නෙත
මතු යම් දිනෙක පුද දෙනු මැන ඔබේ අත
No comments:
Post a Comment